Kvartalsrapport 3-2025

• Totalresultat 3. kvartal 25,6 mill. kr. (102,4 mill. kr)
• Totalresultat hiå 138,7 mill. kr. (167,9 mill. kr)
• Rentenetto hiå 2,11% (2,49%)
• Kostnadsprosent 56,2% (51,2%)
• Kostnadsførte tap 3. kvartal 19,6 mill. kr. (-3,6 mill. kr)
• Vekst utlån 12 mnd. 12,5% (inkl. boligkreditt)
• Vekst utlån PM 12 mnd. 17,8% (inkl. boligkreditt)
• Vekst utlån BM 12 mnd. 2,9% (inkl. boligkreditt)
• Vekst innskot 12 mnd 14,3%

Resultat etter skatt er på 138,7 mill. kr. Tilsvarande tal pr 3. kvartal 2024 var 167,6 mill. kr.

Hittil i år utgjer netto renteinntekter 167,5 mill. kr. Dette utgjer 2,11 % av gjennomsnittleg forvaltningskapital. For tilsvarande periode i fjor utgjorde netto renteinntekter 172,6 mill. kr og 2,49 %.

Renteinntektene har auka med 35,4 mill. kroner samanlikna med same periode i fjor, medan rentekostnadene har auke med 40,5 mill. kroner. Auken i kostnader kjem frå både innskot og verdipapirgjeld.

Netto provisjonsinntekter har auka med 5,9 mill. kr sidan same tid i 2024, og utgjer nå 36,5 mill. kr. Auken kjem i stor grad frå provisjonsinntekter frå SpareBank 1 Boligkreditt og frå forsikring.

Netto finansinntekter utgjer 98,9 mill. kroner pr 3. kvartal 2025, mot 92,7 mill. kroner i tilsvarande periode i fjor. Gevinst ved sal av aksjar i Samarbeidende Sparebanker AS på 35,6 mill. kroner inngår i summen på 98,9 mill. kroner, i tillegg til m.a. resultatdel frå Samarbeidende Sparebanker på 25,7 mill. kroner, utbytte på 15,7 mill. kroner og avkastning på plasseringar i rentefond på 14,5 mill. kroner.

Sum driftskostnader har gått opp frå 104,2 mill. kr til 114,9 mill. kr sidan same tid i fjor. Driftskostnader i prosent av driftsinntekter (ekskl. finansielle postar) er på 56,2 % mot 51,2 % etter tredje kvartal 2024. Kostnadsauken gjeld for det meste eingongshendingar, men også auka aktivitet i banken.

Lagmannsretten avsa den 3. juni dom i rettssaka mellom SpareBank 1 Utvikling DA og Tietoevry Norway AS. Dommen medførte justering av fastprisen bankane i SpareBank 1-alliansen betaler med om lag 100 mill. kr. i året. I andre kvartal gjorde SpareBank 1 Lom og Skjåk ei avsetning for påløpt kostnad for perioden 2023 til andre kvartal 2025 på 3,1 mill. kroner.

Ved utgangen av 3. kvartal har banken resultatførte tap på 31,6 mill. kroner, ein auke på 30,2 mill. samanlikna med tredje kvartal i fjor. Styret og leiinga følgjer situasjonen tett, og er ikkje nøgde med utviklinga i resultatførte tap og balanseførte tapsavsetningar. Auken skuldast fleire forhold, men det meste skriv seg frå negativ utvikling i den økonomiske situasjonen i nokre få store engasjement innan eigedom. Nær ein tredel av resultatførte tap hittil i år gjeld PM, der banken har valt å setje av ein stor del av engasjementet knytt til nokre få kundar som har hatt kundeforhold i banken over lengre tid. I tillegg har banken forbetra metodikk for vurdering av tapsavsetningar i trinn 3, noko som har ført til netto auka tapsavsetningar for både PM og BM. Banken har tett dialog med desse kundane for å sikre ein berekraftig utvikling for alle interessentar, og for å redusere tapa for banken.

Styret har i samarbeid med leiinga sett i verk fleire tiltak for å redusere risikoen i bankens utlånsportefølje. Eit viktig verkemiddel er tilsetjing av kredittsjef, som no er på plass og inngår i bankens leiargruppe. I tillegg har styret revidert policy for kredittrisiko og vedteke handlingsplan for å redusere risikoen i BM-porteføljen. Administrerande banksjef har varsla styret om at det vil bli gjort ytterlegare endringar i organiseringa for at banken på ein effektiv måte skal kunne redusere risikonivået i BM-porteføljen.

Forvaltningskapitalen er på 11,0 mrd. kroner. Banken har pr. 30.09.25 eit volum på 3,1 mrd. kroner i SpareBank 1 Boligkreditt AS. Når ein reknar med dette, er forvaltningskapitalen på 14,1 mrd. kroner. Dette er ein auke på over 2,0 mrd. kr. sidan 30.09.2024 og tilsvarar 16,7 %.

Dei siste 12 månadene har innskot frå kundar auka med 1,0 mrd. kroner, noko som tilsvarar 14,3 %. Innskot frå kundar er nå 8,2 mrd. kr.

Siste 12 månadene har utlåna inkl lån overført til SpareBank 1 Boligkreditt auka med 1,3 mrd. kr til 11,8 mrd. kr som tilsvarar 12,5 %. Utlånsvekst frå privatmarknaden er på 17,8 % og frå bedriftsmarknaden på 2,9 % (12 mnd. Inkl. overførte lån til SpareBank 1 Boligkreditt)

Banken har ein god soliditet med ei rein kjernekapitaldekning og kjernekapitaldekning på 24,98 % og kapitaldekning på 26,76 %. Etter høvesvis konsolidering med selskap i samarbeidande grupper, har vi kapitaldekning på 22,79 %, kjernekapitaldekning på 21,01 % og rein kjernekapitaldekning på 20,84 %. Vi viser elles til kapitaldekningsnota.

Betringa i kapitaldekning kjem av redusert risikovekta balanse i samband med innføring av CRR3, men vi har også ein effekt av sal av aksjar i Samarbeidende Sparebanker AS som gjev reduksjon i frådrag i ansvarleg kapital. Resultatet hittil i år er ikkje medrekna i kapitaldekninga.

Eigenkapitalen medrekna overskotet hittil i år er på 1.621,8 mill. kr.

Vi har ein stabil og god likviditet, og LCR pr. tredje kvartal 2025 på 172 %. Vi viser til note for forfallsstruktur på obligasjonsgjelda.

Rekneskapen er ikkje revidert.

SpareBank 1 Lom og Skjåk var i andre kvartal i prosess med Nordic Credit Rating for tildeling av rating. Vi fekk tildelt BBB+ som langsiktig kredittvurdering med stabile utsikter. Vi meiner dette gjev eit rett bilete av SpareBank 1 Lom og Skjåk.

Vår visjon er «Lokalbanken din – der du er», og formålet vårt er «Drivkraft for utvikling av lokalsamfunnet». I SpareBank 1 Lom og Skjåk – Fjellbanken har vi desse verdiane: nær – solid – livgjevande. Vi er ein viktig samfunnsinstitusjon, som tek ansvar og bryr oss om lokalsamfunnet i bygdene våre i Nord-Gudbrandsdalen.

Gjennom vårt samarbeid med næringslivet, lag og foreiningar, ønskjer vi på vår måte å bidra til positiv utvikling i lokalsamfunnet vårt. Vi har ønskjer om å gje våre bidrag til allmennyttige formål (gåver, sponsorat, arrangement, talentstipend m.m.). Gjennom dette bidreg vi til at det er godt å bu og leva i Nord-Gudbrandsdalen.

Vi bidreg med finansiering til lokalt næringsliv, som skapar aktivitet og arbeidsplassar. Undersøkingar har synt at sparebankane er særs viktige for landets småbedrifter ute i distrikta. I SpareBank 1 Lom og Skjåk har vi god kompetanse og god kjennskap til dei utfordringane og moglegheitane bedriftene i vårt område møter i sitt daglege virke. Vi ønskjer å vera ein god diskusjonspartnar og ein god samarbeidspartnar for næringslivsaktørane. Det er særs viktig at vi er tett på kundane og marknaden i den tida vi nå er inne i, med noko meir økonomiske utfordringar òg for næringslivet.

SpareBank 1 Lom og Skjåk er òg ein stor og attraktiv kompetansearbeidsplass i Gudbrandsdalen. Gjennom å ha tilsette med god kompetanse på mange ulike fagfelt, er vi ein god rådgjevar både for våre privatkundar og våre bedriftskundar. Vi ønskjer å vera ein relasjonsbank for kundane våre, i tillegg må vi ha gode verktøy på dei digitale og mobile flatene.

Vi har mål for ansvarleg og berekraftig bankdrift og ønskjer å forankre ein kultur for berekraftig verksemd, både internt i banken og ut mot kundar og samarbeidspartnarar.

Styringsrenta i Noreg utgjer nå 4,00 %, etter gjennomførte rentekutt i juni og september. Det er gjeve signal frå Noregs Bank om at neste rentekutt vert etter sommaren 2026, men dette vil nok avhenge av innhaldet i statsbudsjettet for neste år. Noregs Bank har oppdatert sine utsikter og varslar at renta da vil utgjera 3,10 % innan utgangen av 2028.

Aktiviteten i norsk økonomi har auka og vore høgare enn venta, og vi har dermed hatt ei god utvikling i Noreg. Dette har ført til høg etterspørsel, låg arbeidsløyse og reallønnsauke som gjev auka kjøpekraft og høgare investeringar enn venta. Prisveksten har vorte noko redusert den siste tida, medan lønnsveksten ser ut til å bli høgare enn venta. Arbeidsløysa har auka noko frå eit lågt nivå tidlegare i år. Det er fleire bransjar som har mindre aktivitet og dette fører til strammare økonomi, noko som har ført til fleire konkursar hittil i 2025.

Vi kjenner alle på ein uoversiktleg og uroleg verdssituasjon, med krig, stormaktsrivalisering og ein farleg politisk situasjon fleire stader. Dette skapar uro både blant privatpersonar og bedrifter.

Vi i Fjellbanken ønskjer å vera til stades for kundane, og vera gode og profesjonelle rådgjevarar og samtalepartar. Det er viktig med god og tett oppfølging gjennom krevjande tider, og i slike periodar er det òg særs viktig at banken er fysisk til stades i marknaden og har god marknadskunnskap og god kjennskap til kundane.

SpareBank 1 Lom og Skjåk Fjellbanken vil òg i framtida ha fokus på å oppretthalde ei god drift og skape gode resultat for å kunne vera ein solid lokalbank og ein aktiv samfunnsaktør i Nord-Gudbrandsdalen.