Kvartalsrapport 1. kvartal 2025

Den gode veksten fortset i 1. kvartal 2025, og pr 1. kvartal kan vi vise til ein utlånsvekst siste 12 månadene på 16,1 % medrekna lån overført til SpareBank 1 Boligkreditt. PM-veksten siste 12 månadene er 22,9 %.

Vi ser at rentenettoen i prosent av gjennomsnittleg forvaltningskapital har gått ned sidan i fjor, drive av ein auke i renteutgifter som skriv seg frå både auke i innskot og auke i obligasjonsgjeld.

Kostnadene er på line med budsjetterte kostnader, og viser ein auke på 4,6 mill. kroner sidan tilsvarande kvartal i fjor.

Kostnadsførte tap er på 4,8 mill. kroner, ein auke på 1,0 mill. kroner samanlikna med fyrste kvartal 2024.

Banken har ein klar strategi i å vekse på låg risiko i personkundemarknaden, spesielt på det sentrale Austlandet med sterke arbeids- og bustadmarknader for å byggje volum, kompetanse og musklar til å betene kjernemarknaden og bidra til gode oppvekstvilkår, ferie- og fritidsaktivitetar, og støtte idrett og foreiningsliv i tillegg til å vera ein motor for arbeidsplassar og lokalt næringsliv.

Resultat etter skatt er på 23,5 mill. kr. Tilsvarande tal pr 1. kvartal 2024 var 27,4 mill. kr.

Pr. 1. kvartal utgjer netto renteinntekter 54,6 mill. kr. Dette utgjer 2,17 % av gjennomsnittleg forvaltningskapital. For tilsvarande periode i fjor utgjorde netto renteinntekter 56,2 mill. kr og 2,47%.

Renteinntektene har auka med 10,4 mill. kroner samanlikna med same periode i fjor, medan rentekostnadene har auke med 12,0 mill. kroner. Auken i kostnader kjem frå både innskot og verdipapirgjeld.

Rentenetto inkl. lån overført til SpareBank 1 Boligkreditt har gått ned frå 1,97 % etter 1. kvartal 2024 til 1,76 % etter 1. kvartal 2025.

Netto provisjonsinntekter har auka med 0,3 mill. kr sidan same tid i 2024, og utgjer 10,3 mill. kr. Provisjonskostnadene har auka med 0,6 mill. kroner og provisjonsinntektene har auka med 0,9 mill. kroner. Vi ser ein god auke i provisjonar frå kredittforetak og forsikring/pensjon samalikna med same kvartal i fjor.

Netto finansinntekter utgjer 9,5 mill. kroner pr 1. kvartal 2025 mot 7,5 mill. kroner i tilsvarande periode i fjor, der heile endringa kjem frå auke i resultatdel frå Samspar-selskapa.

Sum driftskostnader har gått opp frå 36,0 mill. kr til 40,6 mill. kr sidan same tid i fjor. 0,4 mill. kroner skriv seg frå auke i personalkostnader. Driftskostnader i prosent av driftsinntekter (ekskl. finansielle postar) er på 62,1 % mot 50,9 % etter fyrste kvartal 2024.

Ved utgangen av 1. kvartal har banken bokførte tap på 4,8 mill. kroner, ein auke på 1,0 mill. kroner samalikna med fyrste kvartal i fjor.

Forvaltningskapitalen har auka med 13,1 % siste 12 mnd, og er nå på 10,3 mrd. kroner. Banken har pr. 31.03.25 eit volum på 2.8 mrd. kroner i SpareBank 1 Boligkreditt AS. Når ein reknar med dette, er forvaltningskapitalen på 13,1 mrd. kroner. Dette er ein auke på nesten 1,4 mrd. kr. sidan 31.1.2024 og tilsvarar 11,8 %.

Dei siste 12 månadene har innskot frå kundar auka med 638,5 mill. kroner, noko som tilsvarar 9,2 %. Innskot frå kundar er nå 7.607,1 mill. kr.

Siste 12 månadene har utlåna inkl lån overført til SpareBank 1 Boligkreditt auka med 1.565,1 mill. kr til 11.313,4 mill. kr som tilsvarar 16,1 %. Utlånsvekst frå privatmarknaden er på 22,1 % og frå bedriftsmarknaden på 4,5 % (12 mnd)

Banken har ein god soliditet med ei rein kjernekapitaldekning og kjernekapitaldekning på 22,96 % og kapitaldekning på 24,65 %. Etter høvesvis konsolidering med selskap i samarbeidande grupper, har vi kapitaldekning på 21,71 %, kjernekapitaldekning på 19,99 % og rein kjernekapitaldekning på 19,80 %. Vi viser elles til kapitaldekningsnota.

Eigenkapitalen medrekna overskotet hittil i år er på 1.511,3 mill. kr.

Vi har ein stabil og god likviditet, og LCR pr. fyrste kvartal 2025 på 160 %. Vi viser til note for forfallsstruktur på obligasjonsgjelda.

Rekneskapen er ikkje revidert.

Vår visjon er «Lokalbanken din – der du er», og formålet vårt er «Drivkraft for utvikling av lokalsamfunnet». I SpareBank 1 Lom og Skjåk – Fjellbanken har vi desse verdiane: nær – solid – livgjevande. Vi er ein viktig samfunnsinstitusjon, som tek ansvar og bryr oss om lokalsamfunnet i bygdene våre i Nord-Gudbrandsdalen.

Gjennom vårt samarbeid med næringsliv, lag og foreiningar, ønskjer vi på vår måte å bidra til positiv utvikling i lokalsamfunnet vårt. Vi har ønskjer om å gje våre bidrag til allmennyttige formål (gåver, sponsorat, arrangement, talentstipend m.m.). Gjennom dette bidreg vi til at det er godt å bu og leva i Nord-Gudbrandsdalen.

Vi bidreg med finansiering til lokalt næringsliv, som skapar aktivitet og arbeidsplassar. Undersøkjingar har synt at sparebankane er særs viktige for landets småbedrifter ute i distrikta. I SpareBank 1 Lom og Skjåk har vi god kompetanse og god kjennskap til dei utfordringane og moglegheitane bedriftene i vårt område møter i sitt daglege virke. Vi ønskjer å vera ein god diskusjonspartnar og ein god samarbeidspartnar for næringslivsaktørane. Det er særs viktig at vi er tett på kundane og marknaden i den tida vi nå er inne i, med noko meir økonomiske utfordringar òg for næringslivet.

SpareBank 1 Lom og Skjåk er òg ein stor og attraktiv kompetansearbeidsplass i Gudbrandsdalen. Gjennom å ha tilsette med god kompetanse på mange ulike fagfelt, er vi ein god rådgjevar for våre privatkundar og våre bedriftskundar. Vi ønskjer å vera ein relasjonsbank for kundane våre, i tillegg må vi ha gode verkty på dei digitale og mobile flatene.

Vi har mål for ansvarleg og berekraftig bankdrift og ønskjer å forankre ein kultur for berekraftig verksemd, både internt i banken og ut mot kundar og samarbeidspartnarar.

Noregs Bank har sidan desember 2023 halde styringsrenta på 4,5 %, og det er no varsla at rentekutt truleg vil koma etter sommaren, enten i august eller september, og det er marginal sannsynlegheit for eit rentekutt i juni. Det er lagt opp ei prognose der det framgår at styringsrenta vil bli kutta til 4,0 % ved utgangen av året.

Grunnen til at Noregs Bank avventar renteendring er at prisveksten har auka og er klart høgare enn det som var venta. Høg kostnadsvekst hjå bedriftene vil halde prisveksten oppe i tida framover. Lønnsveksten i 2024 vart høgare enn venta, med ein vekst på 5,6 %. Bedriftene i regionalt nettverk melder om auka aktivitet, og dagens arbeidsledigheit er lågare enn venta. Fleire bransjar har nå mangel på kvalifisert arbeidskraft, og det er sannsynleg at denne utfordringa vil auke i tida framover.

Vi er inne i ei tid med usikkerheit og uro, og mange av både privatkundane og næringskundane våre opplever ein stram økonomisk situasjon. Vi ser det da er særs viktig at vi er til stades for kundane våre og er gode rådgjevarar og samtalepartar med tett oppfølging, gode marknadskunnskaper og god kjennskap til kundane.

SpareBank 1 Lom og Skjåk Fjellbanken vil òg i framtida ha fokus på å oppretthalde ei god drift og skape gode resultat for å kunne vera ein solid lokalbank og ein aktiv samfunnsaktør i Nord-Gudbrandsdalen.

Lom, 31.3.2025/12.5.2025
Elektronisk signert

Lom, 31.03.2025/12.5.2025
Elektronisk signert