3. kvartal 2024

Den gode veksten fortset i 3. kvartal, og pr 3. kvartal kan vi vise til ein utlånsvekst siste 12 månadene på 10,3% medrekna lån overført til SpareBank 1 Boligkreditt. PM-veksten siste 12 månadene er 15,8 %.

Vi er veldig tilfredse med at vi klarar å oppretthalde ein sterk rentenetto, og eit resultat av ordinær drift som er omtrent på nivå som etter 3. kvartal i fjor. Vi er glade for å sjå at veksten kjem i dei låge risikoklassene.

Med god hjelp av gevinst ved sal aksjer i Samarbeidende SpareBanker og styrka eigenkapital i SpareBank 1 Gruppen ved Eika Forsikring AS sin inntreden i Fremtind Holding AS leverer vi eit kvartalsresultat på over 102,4 mill. kroner for 3. kvartal, og eit totalresultat på 167,9 mill. kroner etter skatt til nå i 2024.

For 3. kvartal 2024 er resultatet 102,4 mill. kroner, for 3. kvartal 2023 var dette 17,6 mill.kroner, den store forskjellen kjem i stor grad frå netto finansinntekter og frå tap.

Rentenettoen for 3. kvartal utgjer 58,7 mill. kroner (56,6 mill. kroner i 3. kvartal 2023).

Netto finansinntekter er 71,6 mill. kroner (2,6 mill. kroner i 3. kvartal 2023), der resultatdelen frå Samarbeidende Sparebanker AS utgjer 37,0 mill. kroner. Eika Forsikring AS sin inntreden i Fremtind Holding AS medførte auka eigenkapital i SpareBank 1 Gruppen, og dette utgjer kr 31,1 mill. kroner av resultatdelen.

Vi har også bokført ein gevinst på 25,1 mill. kroner ved sal av aksjer i Samarbeidende SpareBanker AS til SpareBank 1 Sogn og Fjordane.

For 3. kvartal 2024 har vi attendeført tapsavsetningar for netto 3,7 mill. kroner (-13,1 mill. kroner i 3. kvartal 2023)

Resultat etter skatt er på 167,6 mill. kr. Tilsvarande tal pr 3. kvartal 2023 var 77,0 mill. kr. Totalresultatet etter 3. kvartal er på 167,9 mill. kr.

Pr. 3. kvartal utgjer netto renteinntekter 172,6 mill. kr. Dette utgjer 2,49 % av gjennomsnittleg forvaltningskapital. For tilsvarande periode i fjor utgjorde netto renteinntekter 156,6 mill. kr og 2,34%.

Auken skuldast i stor grad renteaukane som har vore dei siste åra, og at vi har finansiert utlånsvekst med god innskotsdekning.

Rentenetto inkl. lån overført til SpareBank 1 Boligkreditt har auka frå 1,90 % etter tredje kvartal 2023 til 1,98 % etter tredje kvartal 2024.

Netto provisjonsinntekter har gått ned med 2,5 mill. kr sidan same tid 2023, og utgjer 30,5 mill. kr. Av nedgangen utgjer nedgang i provisjonar frå SpareBank 1 Boligkreditt 0,8 mill. kr. og vi har ein auke i kostnader til betalingsformidling på 1,2 mill. kroner.

Netto finansinntekter utgjer 92,7 mill. kroner pr 3. kvartal 2024 mot 15,1 mill. kroner tilsvarande periode i fjor. Av dette utgjer utbytte og andre inntekter av eigenkapitalinstrument 9,0 mill. kr. , og resultatdel frå Samarbeidende Sparebanker AS (som vi tek inn etter eigenkapitalmetoden) 40,9 mill. kroner. (Av dette er kr 31,1 mill. kroner effekt av Eika Forsikring sin inntreden i SpareBank 1 Gruppen) På same tid i fjor var utbytte 5,0 mill. kr. og resultatdelen frå Samarbeidende SpareBanker AS 2,7 mill. kr.

Pr. 3. kvartal har vi netto verdiauke på finansielle instrument på 42,8 mill. kr, mot 7,4 mill. kr i same periode i fjor. Vi har reduksjon i verdi av fastrentelån med 1,2 mill. kr, på same tid har vi skrive opp verdien av renteswapavtaler vi har for dei same fastrentelåna med 0,5 mill. kr. Vi har også bokført netto verdiauke på rentepapir, aksjar og eigenkapitalinstrument med 43,5 mill. kr. Av dette er 25,1 mill. kroner bokført gevinst ved sal av aksjer i Samarbeidende Sparebanker AS til SpareBank 1 Sogn og Fjordane.

Sum driftskostnader har gått opp frå 94,1 mill. kr til 104,2 mill. kr sidan same tid i fjor. 7,2 mill. kroner av denne auke skriv seg frå auke i personalkostnader, mens resterande auke kjem frå andre driftskostnader. Kostnadsauken kan i stor grad tilskrivast auka aktivitet i banken. Driftskostnader i prosent av driftsinntekter (ekskl. finansielle poster) er på 51,2 %, opp frå 49,6 % på same tid i fjor.

Ved utgangen av september har banken bokførte tap på 1,3 mill. kr. I 2023 flytta vi alle utlån knytt til næringane «utvikling og sal fast eigedom», «oppføring av bygninger» og «kjøp og sal av fast eigedom» frå trinn 1 til trinn 2. Dette er gjort med bakgrunn i at dette er bransjar som har store utfordringar, og at utsiktene for marknaden for utvikling av bustader er svakt. Effekten på denne flyttinga utgjer 6,1 mill. kroner. Vi har ikkje opplevd tap innan desse bransjene, men vel likevel å oppretthalde flyttinga til trinn 2.

Forvaltningskapitalen har auka med 4,6 % sidan utgangen av september i fjor, og er nå på 9.506,0 mill. kr. Banken har pr. 30.09.24 eit volum på 2.544,9 mill. kr i SpareBank 1 Boligkreditt AS. Når ein reknar med dette, er forvaltningskapitalen på 12.050,9 mill. kr. Dette er ein auke på 460,7 mill. kr. sidan 30.09.23 og tilsvarar 4,0 %.

Innskota har hatt ein auke på 4,7 % til nå i år, og dei siste 12 månadene har innskot frå kundar auka med 274 mill. kr, noko som tilsvarar 4,0 %. Innskot frå kundar er nå 7.143,7 mill. kr.

Til nå i år har vi hatt ein utlånsvekst på 9,1 % medrekna lån overført til SpareBank 1 Boligkreditt.

Siste 12 månadene har utlåna inkl lån overført til SpareBank 1 Boligkreditt auka med 983,6 mill. kr til 10.529,1 mill. kr som tilsvarar 10,3 %.

Banken har ein god soliditet med ei rein kjernekapitaldekning og kjernekapitaldekning på 23,58 % og kapitaldekning på 24,50 %. Etter høvesvis konsolidering med selskap i samarbeidande grupper, har vi kapitaldekning på 21,38 %, kjernekapitaldekning på 20,31 % og rein kjernekapitaldekning på 20,17 %. Vi viser elles til kapitaldekningsnota.

Eigenkapitalen medrekna overskotet hittil i år er på 1.493,8 mill. kr.

Vi har ein stabil og god likviditet, og LCR ved utgangen av september 2024 er på 202 %. Vi viser til note for forfallsstruktur på obligasjonsgjelda.

Rekneskapen er ikkje revidert.

Vår visjon er «Lokalbanken din – der du er», og formålet vårt er «Drivkraft for utvikling av lokalsamfunnet». I SpareBank 1 Lom og Skjåk – Fjellbanken har vi desse verdiane: nær – solid – livgjevande. Vi er ein viktig samfunnsinstitusjon, som tek ansvar og bryr oss om lokalsamfunnet i bygdene våre i Nord-Gudbrandsdalen.

Gjennom vårt samarbeid med næringslivet, lag og foreiningar, ønskjer vi på vår måte å bidra til positiv utvikling i lokalsamfunnet vårt. Vi har ønskjer om å gje våre bidrag til allmennyttige formål (gåver, sponsorat, arrangement, talentstipend m.m.). Gjennom dette bidreg vi til at det er godt å bu og leva i Nord-Gudbrandsdalen.

Vi bidreg med finansiering til lokalt næringsliv, som skapar aktivitet og arbeidsplassar. Undersøkjingar har synt at sparebankane er særs viktige for landets småbedrifter ute i distrikta. I SpareBank 1 Lom og Skjåk har vi god kompetanse og god kjennskap til dei utfordringane og moglegheitane bedriftene i vårt område møter i sitt daglege virke. Vi ønskjer å vera ein god diskusjonspartnar og ein god samarbeidspartnar for næringslivsaktørane. Det er særs viktig at vi er tett på kundane og marknaden i den tida vi nå er inne i, med noko meir økonomiske utfordringar òg for næringslivet.

SpareBank 1 Lom og Skjåk er òg ein stor og attraktiv kompetansearbeidsplass i Gudbrandsdalen. Gjennom å ha tilsette med god kompetanse på mange ulike fagfelt er vi ein god rådgjevar for våre privatkundar og våre bedriftskundar. Vi ønskjer å vera ein relasjonsbank for kundane våre, i tillegg må vi ha gode verkty på dei digitale og mobile flatene.

Vi har mål for ansvarleg og berekraftig bankdrift og ønskjer å forankre ein kultur for berekraftig verksemd, både internt i banken og ut mot kundar og samarbeidspartnarar.

Noregs Bank har på rentemøta i 2024 vald å halde styringsrenta uendra, og med bakgrunn i dette har styringsrenta i Noreg vore på 4,50 % sidan rentehevinga i desember 2023. Det er pr. i dag noko usikkerheit vedrørande ei renteendring i desembermøtet, men det er frå fleire hald lagt inn prognoser på tre eller fire renteendringar i 2025, slik at vi vil kome ned på ei styringsrente på 3,25 % frå 2026. Sentralbankane i andre land har allereie starta rentekutt.

Det har den siste tida vore svak økonomisk vekst, medan kapasitetsutnytting og ledigheit er på normalnivå. Vi har samtidig ein høg lønnskostnadsvekst etter årets lønnsoppgjer og kronekursen er fortsatt svak og det ventes at krona vil halde seg svak i ein periode framover. Med bakgrunn i dette vert Noreg sett på som eit «billig» land frå Europa og USA, og dette merkast òg ved at vi gjennom året har hatt ein høg andel av utanlandske turistar i Noreg.

Ulike undersøkjingar syner at gjennomsnittsbedriftene ventar ein svakare marknadssituasjon dei neste seks månadane. Det er store ulikheitar mellom ulike bransjar og ulike geografiske områder. Innan oljerelaterte bransjar er det ei positiv utvikling og optimisme, medan dei bedriftene som rettar seg mot heimemarknaden, til dømes byggebransjen og deler av varehandelen, slit og har eit mindre optimistisk syn på den næraste framtida. I bygg og anlegg er det òg fleire verksemder som manglar arbeidskraft, etter at utanlandske arbeidstakarar har returnert til heimlandet.

Vi har den siste tida hatt stor internasjonal uro, med fleire pågåande krigar og tiltakande stormaktskonfliktar. Dette fører med seg stor usikkerheit, og er ein drivar til aukande prisvekst globalt.

Bedriftsmarknaden opplever vekst innan landbruk. Det er fleire fjøsbygg under oppføring og renovering hausten 2024. Vi har hatt fleire søknader om byggelån i kombinasjon med stønad og lån frå Innovasjon Norge i 2024 samanlikna med 2023. Utvikling av eigedom er den bransjen vi ser langt lågare aktivitet. Andre næringar synes å væra prega av jamn drift. Vi har hatt få konkurser i portefølja til banken, og vi ventar ikkje fleire konkursar enn det vi normalt har.

Vi har godt håp om at vi i tida framover også kan forsetje den gode veksten vi har i personmarknaden, der vi kan vidareutvikle satsinga ved Oslokontoret og samarbeidet vi har med DNT.

SpareBank 1 Lom og Skjåk Fjellbanken vil òg i framtida ha fokus på å oppretthalde ei god drift og skape gode resultat, slik at vi kan vera ein solid lokalbank og ein aktiv samfunnsaktør i Nord-Gudbrandsdalen.

Lom, 30.9.2024/8.11.2024
Elektronisk signert

Lom, 30.9.2024/8.11.2024
Elektronisk signert